Plantun de Prouvènço

Pèr coumpara dos planto d'encò nostre

Bupleurum rotundifolium & Lycium barbarum

Perso-fueio

Bupleurum rotundifolium

Apiaceae Umbelliferae

Autre noum : Erbo-coupiero.

Noms en français : Buplèvre à feuilles rondes, Buplèvre engainé.

Descripcioun :
Planto que se recounèis à si fueio quàsi roundo, en generau óuvalo, qu'entouron la cambo (perso-fueio). Sis oumbello an de 4 à 8 raioun, ço que lou destrìo de Bupleurum subovatum que n'en a soulamen 2 o 3. Trachis dins li champ de cerealo en agriculturo tradiciounalo o bioulougico.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 10 à 70 cm
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Bupleurum
Famiho : Apiaceae
Famiho classico : Umbelliferae

Ordre : Apiales

Coulour de la flour : Jauno
Petalo : 5
Ø (o loungour) enflourejado : 1,5 à 3 cm
Flourido : Printèms - Estiéu

Sòu : Ca
Autour basso e auto : 0 à 1700 m
Aparado : Noun
Remarco : Champ de cerealo
Mai à avoust

Liò : Champ - Meissoun
Estànci : Mesoumediterran à Coulinen
Couroulougi : Mediterrano-touranienno
Ref. sc. : Bupleurum rotundifolium L., 1753

Arnavèu-blanc(-de-Barbarìo)

Lycium barbarum

Solanaceae

Autre noum : Bouissoun-blanc.

Nom en français : Lyciet commun.

Descripcioun :
L'óurigino éuroupenco d'aquest arnavèu-blanc èi discutido. Sèmblo pèr la maje part planta. Es un aubret que fai de flour vióuleto sus de ramo retoumbanto e espinouso. Lycium europaeum a de flour palinouso e d'espinasso alor que Lycium chinense fai de flour mai larjo e porto ges d'espino.

Usanço :
Emai li fueio e li fru sarien manjadis (F. Couplan, op.cit. p. ) cue, soun subretout li fru que soun utilisa en medecino tradiciounalo chinese emé lou noum de "goji". Soun proun anti-óussidant e manja pèr faire dura d'alòngui la vido (paradis terrestre di taouïste). Èi vertuous contre un fube de malautié : anti-cancerous, bon pèr lou cor, contro l'ipertesuro, l'iperglicemìo, lis artèri tapado...